حساسات وموبايل بدل المتابعة.. إزاي الأجهزة بقت تراقب الدواجن جوه العنبر؟

بدأت بعض مزارع الدواجن تعتمد على أجهزة بسيطة تساعد المربي في متابعة القطيع بدون ما يفضل داخل العنبر طول الوقت، وده من خلال تركيب حساسات وأنظمة بتشتغل بشكل تلقائي وترسل معلومات أول بأول.

ويستعرض موقع “أرضك” الإخباري شكل التكنولوجيا دي وإزاي بتتطبق على أرض الواقع.

مزارع الدواجن:

حساسات تقيس الجو لحظة بلحظة

بيتم تركيب أجهزة صغيرة جوه العنبر بتقيس الحرارة والرطوبة، ولو الجو بقى غير مناسب بتبعت تنبيه فورًا للمربي عشان يتدخل.

تشغيل المراوح والشفاطات أوتوماتيك
 

بعض المزارع بتوصل الحساسات بالمراوح، بحيث تشتغل لوحدها لما الحرارة تعلى، وتقف لما الجو يظبط، من غير تدخل يدوي.

الموبايل بقى أداة متابعة

المربي بيستقبل إشعارات على الموبايل لو حصل أي مشكلة زي حرارة عالية أو ضعف تهوية، وده بيوفر وقت ومجهود كبير.

كاميرات تتابع حركة القطيع

في مزارع متقدمة شوية، بيتم استخدام كاميرات تراقب حركة الدواجن، ولو في خمول أو تجمع غير طبيعي، بيكون مؤشر لمشكلة.

الفكرة ببساطة

التكنولوجيا هنا معناها “أجهزة بتقيس وتبعت تنبيه”، مش أكتر، والمربي هو اللي بياخد القرار ويتصرف في الوقت المناسب.