بتحط سماد كتير وبرضه الإنتاج ضعيف؟.. السر في الطريقة مش الكمية
يعاني بعض المزارعين من ضعف واضح في استجابة المحاصيل للتسميد، رغم استخدام كميات مناسبة من الأسمدة، وهو ما يطرح تساؤلًا مهمًا: هل المشكلة في السماد نفسه أم في طريقة استخدامه؟
ويستعرض موقع “أرضك” الإخباري أبرز الأسباب التي تؤدي إلى فقدان كفاءة السماد داخل التربة، وكيف يمكن تحسين الاستفادة منه لتحقيق أفضل إنتاج.
أبرز الأسباب التي تؤدي إلى فقدان كفاءة السماد:
التسميد بدون ري مناسب
عدم وجود رطوبة كافية في التربة وقت إضافة السماد بيقلل من ذوبانه، وبالتالي لا يصل للجذور بالشكل المطلوب، وده بيخلي النبات كأنه لم يحصل على التغذية.
الري الزائد بيغسل السماد
في المقابل، الإفراط في الري بعد التسميد مباشرة ممكن يؤدي إلى فقد جزء كبير من العناصر مع مياه الصرف، خاصة في الأراضي الرملية.
التوقيت الغلط
إضافة السماد في توقيت غير مناسب من عمر النبات، أو في مراحل لا يحتاج فيها نفس العنصر، بيؤدي إلى ضعف الاستفادة، حتى لو الكمية صحيحة.
عدم توازن العناصر
الاعتماد على نوع واحد من السماد بدون تنويع العناصر بيعمل خلل في التوازن الغذائي للنبات، وده بيأثر على امتصاص باقي العناصر.
تأثير الحرارة
درجات الحرارة المرتفعة ممكن تقلل من كفاءة بعض الأسمدة، خاصة لو تم إضافتها في أوقات غير مناسبة خلال اليوم.
حالة التربة نفسها
لو التربة ضعيفة أو فيها مشاكل زي الملوحة أو القلوية، ده بيمنع امتصاص العناصر حتى لو السماد موجود.
الحل في الإدارة مش الكمية
زيادة السماد مش هي الحل، لكن إدارة التسميد بشكل صحيح من حيث التوقيت، والري، ونوع التربة هو اللي بيحدد النتيجة.
السماد مش ضمان لوحده لنجاح المحصول، لكن طريقة استخدامه هي العامل الأساسي، وأي خطأ بسيط ممكن يضيع مجهود وتكلفة بدون نتيجة حقيقية.